Ræktaðu geðið og styrktu Geðhjálp
Yfir þorrann, þá býður Geðhjálp upp á dagleg hollráð til þess að bæta geðheilsu. Við köllum þessi hollráð G vítamín.
Borðaðu hollan mat í félagsskap annarra
Það að nærast er ein af grunnþörfum lífsins. Líðan okkar stendur í nánum tengslum við mataræði. Borðaðu þrjár aðalmáltíðir á dag og tvo til þrjá millibita. Ef þú borðar of sjaldan yfir daginn aukast líkurnar á því að þú borðir yfir þig á kvöldin. Það er einnig mikilvægt að njóta matarins, gefa sér tíma til að borða hann. Íslendingar borða oft og tíðum of hratt. Máltíðir hafa í gegnum tíðina endurspeglað félagslega athöfn þar sem fólk upplifir mennsku sína. Það að deila máltíð með öðrum getur fært þér lífshamingju. Einbeittu þér að matnum og félagsskapnum. Drekktu í þig stemninguna og finndu þá afslöppun sem kemur í kjölfarið.
17. febrúar, 2023
G vítamín hollráð
G vítamínið er byggt á Geðorðunum 10 og 14 Lífsorðum Héðins Unnsteinssonar og Þórdísar Rúnarsdóttur. Sjá nánar á landlaeknir.is og hedinn.org/lifsordin14