Þökkum fyrir daginn að kvöldi
Stundum er afrek að komast í gegnum langa daga. Sestu niður að kvöldi hvers dags og farðu yfir alla atburði hans, samskipti, hugsanir og líðan og leitastu við að upplifa þakklæti fyrir daginn. Vertu þakklát(ur) fyrir allar vökustundir dagsins – hvort sem þær færðu þér vellíðan eða vanlíðan og dragðu af þeim þakkláta niðurstöðu sem færir þig nær sátt. Sátt við lífið. Vertu svo viðbúin(n) að mæta nýjum degi sem færir þér ný tækifæri og áskoranir til framfara sem manneskja.
Við þurfum öll að rækta og vernda geðheilsu okkar. Rétt eins og með líkamlega heilsu, þar sem öllum er ráðlagt að taka vítamín daglega, gerir margt smátt eitt stórt í geðrækt.
Geðhjálp býður því upp á skammta af G-vítamíni á þorranum; ráðleggingar sem er ætlað að bæta geðheilsu. Markmið átaksins er að efla geðheilsu landsmanna en um leið að fyrirbyggja bresti og verja okkur í mótbyr. Með daglegri inntöku G-vítamíns myndum við öflugra ónæmi, því þessi einföldu ráð eru verndandi þættir geðheilsu.
Daglega birtast góð ráð á gvitamin.is, Facebook og Instagram, auk þess sem hægt er að sækja skjáhvílur hér fyrir neðan og fá G-vítamín beint í símann á hverjum degi.
G-vítamínið er byggt á Geðorðunum 10 og 14 Lífsorðum Héðins Unnsteinssonar og Þórdísar Rúnarsdóttur. Sjá nánar á landlaeknir.is og hedinn.org/lifsordin14
